«Вай ингали» яхача пхьоаллен кулгалхочо Магасе берашта лаьрхӏа гойтама болх дӏабихьар
Магасерча культурах, спортах, туризмах йолча моттиге; берашта лаьрхӏа гойтама болх дӏахьош хилар «Вай ингали» яхача пхьоаллен кулгалхо. Тхьоврача хана денз, вай даьша хьадахьаш дола топпарах хӏамаш хьакхоллара гӏулакх ма дарра довза аьттув бар берий цу дийнахьа.
«Лакха говзал, начӏал долча пхьара дӏахьокхаш, тайп-тайпара хӏамилгаш хьаеш даьхкар бераш топпарах. Къаьстта чӏоагӏа тамашийна хийтар царна, топпара гӏоз кхестабеш, болх дӏабахьар. Хӏара бера дог ураоттадеш, цу оагӏонцарча гӏулакхаца дувзаденнараш ма дарра доаржадеш моттиг хилар цох. Хӏара бер ший кулгашца цхьацца хӏама хьае ловш дар. Хӏаьта берий ноаноша белгалдечох, иштта дӏахьоча урокаша бераш кхоллама тӏаоз, цу оагӏонцарча наькъ тӏа хьалхара гӏа баккха гӏо ду», - дийцар «Сердалога» Магасерча спортах, туризмах, культурах йолча моттига болхлоша.
2019-ча шера денз, топпарах хӏамаш хьаеш бола болх боаржабеш хьавоагӏаш ва вай мехкахо Атиганаькъан Беслан. Цу оагӏонца геттара халадараш эггара хьалхарча оагӏонца шаьрдеш, къахьега волавелар воккха говзанча.
2023-ча шера грантаца хьаллаьцар Беслана проект. Хӏаьта цу гӏулакхо аьттув белар цунна «Вай ингали» яха пхьоалле хьаелла, из говзал дикка йоаржае. Тайп-тайпарча кхетаченашка, гойтама балхашка вай республика дӏайовзийташ, боккхача наькъ тӏа ваьнна, майрра гӏа боаккхаш хьавоагӏарех ва ала йиш я тахан, лакхаленашка кхача гӏерташ ший гӏулакх массанена дӏадовзийташ волча Бесланах.
