Магасе хьалийцар, полицейски хиннача сага дов даьраш
ГӏалгӀайчен столице Магасе хьалаьцар ши саг, чурча гӀулакхий органашка балха хиннача сага дов дарах дегабуам беш.
ГӏалгӀай Республике гӀолла йолча Россе СК тохкамхой Наьсарен отдело хьадийллар, хӀанз тохкаш да РФ УК 1 даькъа 318 статьях дола уголовни гӀулакх. Цо Ӏаьдала болхлочун низ барах бехктокхаме оз саг, яхаш, дийцар «Сердало» газетага ГӏалгӀай мехка гӀолла йолча Россе тохкама комитета зарбан болх лелабераша.
Тохкам дӀабихьараша яхачох, 2025 шера тов бетта 9-ча дийнахьа, 1 сахьат 40 минот яьннача хана, Гаьгенаькъанн Ботий цӏерах болча урам тӏа, ши зуламхо тӀакхийтта, бокъонаш лораяра органий болхлочунна, травматически герз а долаш, мӀаргеи бийнаши детташ, моттиг хилар. Тохкамхоша из зулам дара бахьан, из саг чурча гӀулакхий органашка балха хинна хиларца дувзаденна да, аьнна, чӀоагӀдир.
Тохкама отдела болхлоша, криминалисташа сиха шоай болх дӏабахьарах, уж сиха хьалехар. Карарча хана уж лаьца боахк. Царга уж бехке хилар дӀакхайкадергда, иштта судага дӀадахьийтад, тохкама болх дӀахьоча юкъа уж чубохкара дехар. Из уголовни гӀулакх дӀахо тохкаш да.
