Бокъо йоацача тайпара машин хьовзаярах, «BMW» даьна духьала гӏулакх хьадийллар Магасе
Наькъа юкъе «BMW» кхестаяьча сага духьала гӏулакх хьадийллар Магасерча полице болхлоша. Наькъашкара бокъонаш лораеш воацаш, дӏатӏавала йиш йоацача оагӏон тӏа ваьнна, машин кхестаяьй цо. Гонахьарча машинашта боккха кхерам тоссаш гӏулакх да цо леладаьр.
«Из во гӏулакх карагӏдаьннар ва Наьсарера 23 шу даьнна вахархо. Полице ӏочувоалаваьчул тӏехьагӏа, дари даь, дехкевоалаш къамаьл даьд цо. Из тайпара хӏама леладар эзделца, эхьаца доацилга хьалхадоаккхаш къамаьл дир цунца полице болхлоша. РФ КоАП 19.3 ст. бехктокхаме озаш ва из саг (полице болхлочо бокъонца белгалдаь хӏама теркал ца дар). Карарча хана ӏаьдала кара ва из», - йоах «Сердалога» Россе вай мехкарча МВД зарбан болх лелаберашкара бенача хоамо.
Тохкама оагӏон болхлоша РФ УК 267.1 ст. гӏулакх хьадийллад цунна духьала, наькъ тӏарча кхерамзленца дувзаденнараш толхадеш, харцахьа ваьнна кхестарах.
Мехкарча МВД кхайкарал ду, бокъонаш телхаеча тайпара машинаш кхестаяр, хьалхавоаларгах хехкар, кхераме дола гӏулакхаш доаржадар шин шерага кхоачаш ха тохаш зулам долга.
