МагӀалбикерча Крайни урам тӀа, бӀеха хиш дӀаахийта кӀоаг баьккхар
01.07.2025 16:28
МагӀалбикерча Крайни оалача урам тӀа, бӀеха хиш дӀаухаргдола 300 метр кӀоаг боаккхаш ба. Проект кхоачашъеш я моттигерча бахархоша дехарах, уж цу дехарца цкъа баха а Ӏийнабац администраце, яхаш, дийцар шахьара мэре «Сердало» газетага.
«Ахча хьожадеш да дакъа лоацача кепара: 70% ахча хьахьожадаьд моттигерча бюджетера, юхедиса 30% наха, шоаш раьза болаш, гулдир. Цу тайпара, цар балхаш дӀадоладарал совгӀа, уж кхоачашдеча а дика дакъа лоац», - аьлар хоамо.
Бӏеха хиш дӀаахара йола моттиг хиларах, дикка тоалургда Крайни урам тӀа бахача наьха вахара хьалаш. Болх дӀахьош ба графиках, ховш ма хиллара, из чакхбаргба кастлуш.
