МагӀалбике Бериславске урамах керда тӀий туллаш латт
ГӏалгӀайчен МагӀалбике хьалдеш да керда тӀий, «Вахара хьалаш» яхача программа чудоагӀаш, Бериславске урамах. Кердача гӀишлоно из урам хоттаргба Гогола урамах, из лоархӀаме а хургда, хӀана аьлча цига дукха транспорт лелаш хиларах. Проект кхоачашъеш хиларо таро лу гӀашлой а иштта машинашца леларий а таронаш тоае, царна керда хьалаш дала, яхаш, дийцар «Сердало» газетага шахьара мэре.
«Хӏанз укх сахьате, никъ нийсбаь баьннаб. Дӏахо укхаза керда асфальт Ӏобулларгба, гӀашлой никъ а хургба, ток кхоеш йола сердал а ӀойогӀаргья, из никъ нийсса центральни дарбанчен тӀабодаш хургба», - аьлар хоамо.
Гӏишлошъяра болх мишта дӀахьу хьожаш, цига ваха хилар шахьара кулгалхо Галай Муса. Цо белгалдир, из гӀишло чӀоагӀа эшаш хилар, цо шахьара хьалаш дегӀадоаладара даькъе доккха дакъа дӀалоацаргда.
