МагIалбике 80 моттиг йола керда берий беш хьалъе лаьрхIад
МагIалбик-Шахьаре М. Ю. Лермонтова урамагIа берий беш хьалъеш латт, 80 бер тIаэца таро хургйолаш. ТIехьа тIайоагIача хана, вахара хьалаш тоадара лаьрхIа из хьалъеш я, «ДегIадар» яхача федеральни проекта чуйоагIаш. Из карара шу йистедалалехь хьалъяь яргья.
«ХIанз доазув тоадеш, фо чукхетийтара лаьрхIа бола гIирс дIаоттабеш, тховнаш тоадеш, сердал чуюллаш дола балхаш да дIахьош. Иштта чура инженерни балхаш доахаш да тхо», - аьлар «Сердало» газетага «Маяк» ООО оалача цига къахьегараша.
Шозза вIаштIара яьча берий беша гIишлон чу хургья, хоза тоаяь хIара берий тоабанна лаьрхIа фусамаш, паргIатта хIама хьалъолла, ловза, наб е моттигаш. Иштта укхаза хургья лорий кабинет, кхоллама болх берашца из дIабахьара йола изостудии.
Къаьстта терко тIайохийт цу проекто кхерам боаца ловзарий моттигаш хилийтара, ара цIенача фега садаха берий таро хургйолаш. Берий беша доазон тIа физкультуранна лаьрхIа берий хIара тоабан майдаш хургья.
