Магӏалбике «Юрт-ганз» яха юртарча кагирхой фестиваль чакхъяьлар
Халкъа цхьоагӏон Ди долаш, Магӏалбика Серго Орджоникидзе цӏерагӏча культуран, салоӏама парке доккха цӏай хилар. Укхаза чакхъяьлар «Юрт-Ганз» яха республикански фестиваль. Цига дакъа лоацаш вар кагирхой гӏулакхех йолча Комитета кулгалхо Пхьошанаькъан Зоврбик, шахьара администраце кулгалхо Боканаькъан Мухьмад; боахамий, юкъарлон цхьанкхетарий викалаш, иштта СВО ветеранаш, цар дезал, «Даьхен Лорабой» ганза вахара болх лелабераш.
Парка аллеяш хьалйизаяр халкъа говзанчий гойтама балхех, ярмаркех. Цига хӏара саг таро йолаш вар, мах боацаш, говзанч-классаш дӏахьоча дакъа лаца. Фестивала хьаьшашта дайзар этнокультура совгӏаташ, къаман спортивни яхьаш, ловзараш. Къаьстта теркам тӏабодаш дар гӏалгӏай къаман даараш, цӏай хьаллоацаш дар кхоллама вӏашагӏкхетараш, артистий программаш. Моттигерча кагирхошта, лаьрххӏача операце бӏухой дезалашта из ди дика салоӏам беш дар.
«Юрт-Ганз» яха этнопроект кхаь даькъа йийкъа яр. Наьсарен кхален Гӏаьзе-Коа, Шолжа кхален Гӏажарий-Юрта гӏолла чакхъяьнна фестиваль ера Магӏалбике. Из йоккха кхетаче вӏашагӏъеллар Гӏалгӏайчен кагирхой Комитето, «Кагирхойи бераши» яхача къаман, иштта «Республико кагирхошта» яхача федеральни проекта чуйоагӏаш.
Магӏалбике из чакхйоалаш хиларо хьагойтар, цу тайпара болх дика вӏашагӏбелла дӏахьош хиларо республикан культуран тӏехьале лораю, ноахалашта юкъера бувзам лелабу, кагирхой юкъебоах дикача гӏулакхашта, кхоллама вахара.
