МагIалбикерча НурадиловгIар урам тIара гIашлой никъ тоабир
МагIалбик-Шахьаре НурадиловгIар Х. цIерагIча урам тIара гIашлой никъ тоабир. Из болх дIабихьар машина наькъаш тоадара йолча ГIалгIайчен Министерствос «Шахьара хьалаш тоадар» яхача программанна чудоагIаш. ХьалхагIа цу урам тIа дIахьош хиннача балхашта тIехьара тIа беш бар из болх. Наькъашкара хьал аттача даккхаро таро лу шахьара хьалаш тоаде а, берригача наькъа доакъашхошта дика хьалаш хьакхолла а.
«Из болх дIахьош ба, наха лела аттагIа хургдолаш. Керттердар тахан наха атта хургдолаш хьалаш хьакхоллар, наькъа дехьабала, гIаш лела, деррига эшаш мел дола хьалаш юкъедоаладеш уж балхаш дIахьош хилар, къаьстта цу тайпара болх ба хIанз наькъаш тоадеча дIахьош бар, цар таро лу дукха машинаш лелаш яр аьнна доацаш, паргIата а ца кхераш а шоай никъ дIабахьа», - аьлар «Сердало» газетага МагIалбика администраце.
ХIанз хьабеш латтача балха даькъ тIа кхы а сердал оттае еза, наха баьдеча хана лела паргIато хургйолаш. Цо тIехьара тIа таро лу гIашлой кхерамзле лорае; цул совгIа, шахьара куц-сибат а тоаду.
