Магӏалбикера Гарданаькъан цӏерах бола урам тоабеш баьхкар болхлой
28.11.2025 09:29
Гарданаькъан цӏи лелаеш болча ураме хувцамаш хилар. Шахьара ганзерча ахчах дӏахьош хинна из болх лоархӏаме бар тахан. Хоза тоабаь латта урам бахархой дегашта тоам беш хургба.
«Шаьра, дика никъ ба тахан биллар. Кхерамзлен хьал меттаоттадара тӏехьа а чӏоагӏа лоархӏаме дар из. Бахархой из никъ тоабарга хьежа тоъал ха яр. Урамерча унахой тӏалаттача моттига, ишкола юхе машинаш ӏоувттае доазош къоастадаьд. Машинашца леларашта санна, гӏаш лелача наха а лоархӏаме дар цу урама хьал меттаоттадар», - дийцар «Сердалога» шахьара администраце болхлоша.
Гарданаькъан цӏерах бола урам эггара дукхагӏа машинаш лелаш, нах лелаш ба тахан. Магӏалбикерча наьха вахара хьал дикка аттачахьа доаккхаш болх хилар цох.
