Мехкдаьттхой салоӀама моттиг тоаеш, болх дӀабихьар МагӀалбике
Эггара дукхагӀа бахархой салаӀа гуллуш йола моттиг - мехкдаьттхой сквер тоаеш къахьийгар МагӀалбике. «Туризми хьаьша тӀаэцари» яхача, салоӀа моттигаш Ӏалашъеш йолча къаман проектага гӀолла дӀабихьар из беркате болх.
«Проект вӀашагӀъеллараш, из кхоачашъяьраш «ГӀалгӀайче вахар» яха туроператори туризмах йола комитети я. Шахьара моттигаш тоаярал совгӀа, туризмаца дувзаденнараш меттаоттадеш, бахархой хьал аттача доаккхаш болх ба из. «Сердалога» из хоам бир МагӀалбикерча администраце.
Тоаяь сквер шахьара куц хоздеш я. МоллагӀча ханага кхаьчача наха салаӀа, болабала паргӀата хургйолча тайпара дӀабихьар болх. Бахархой дог гӀоздоаккхаш моттиг хургья цох, иштта шахьаре баьхкача хьаьшашта самукъадаккха моттиг я.
Шахьарера моттигаш эргайоахаш, куц тоадеш дӀахьоча балха юкъе лоархӀаме моттиг дӀалоацаш да къаьстта из сквер тоаяр. «Туризми хьаьша тӀаэцари» яхача къаман проекто дӀадеххача тайпара, хувцаденнад тахан цигара хӀама.
