ГӀалгӀайчен МагӀалбика кхале, гурахьа эскаре амал де кагий нах тӀахьехарга кийчо еш ба
07.09.2023 14:34
МагӀалбика кхален администраце кхетаче дӀайихьар, цига дийца дош дар эскаре амал де кагий нах гурахьа тӀахьехарца дувзаденна. МагӀалбика тӀема комиссариата кулгалхочо ГӀоандалой Микаила хоам бир гулбеннарашка, цу даькъ тӀа хиннача хувцамех.
«Эггара хьалха тӀема комиссара хьоахадир, амал де тӀавехачун яьнна ха хувцаялар. ХьалхагӀа из 27 шу хиннадале, хӀанз наджгоанцхой бетта цхьоалагӀча дийнахьа денз, из ха 30 шерга кхаччалца я, аьнна, закон арадаьннад. ТӀавехаш волчун ха 18 шергара дӀайолалу, из хувцаденнадац.
ТӀема чинага хьежжа, эскаре гӀулакх даь дӀабоаларий ха лакхъяьй. Законо юкъедаьккхад, ший ханнахьа хьатӀацавоагӀачунна е къайлавувлаш лелачунна гӀод тохар.
ГӀулакхерча наха гӀод тохар 60-80 эзар сом да, юридически наха — 400-500 эзар сом. ТӀема комиссариата ца ховш, ше ваьхача моттигера дӀавахачунна 20 эзар сом.
Иштта гӀод тоха лаьрхӀад, бахьан а доацаш, ше тӀема комиссариате хьатӀавийхача ца воагӀаш Ӏийначоа. ГӀод тохаргда, шийга повестка хьаеча, кулг ца яздеш Ӏийначоа», — аьлар «Сердало» газетага доал деча даькъ тӀарча администраце.
