Из никъ керттера ба, цо дӀахотт СоагӀапче лоалахарча юрташца. Укх дукхача шерашка тоабе безаш латтар из, тӀеххьара цӀенхаштта из тоабаьбар 20 шу хьалха.

ГӏалгӀайчен Кулгалхочо Келаматанаькъан Махьмуд-Ӏаьлас белгалдир, из никъ тоабарах наькъа кхерамзле а хургья, моттигерча наьха вахара хьалаш а тоалургда, аьнна.

«Таханарча дийнахьа цу юрта вах 14 500 саг. Укхаза кхо ишкол, шиъ берий беш, ФАП (амбулатори), иштта культуран Цӏа, физкультурно-унахцӀенон комплекс я», - аьлар цо.

Автодора Министерствос лаьрхӀад, ер шу чакхдалале цу моттигера балхаш чакхдаха. 2025 шера 11 никъ кердабаккха лаьрхӀад, цар дӀоахал - 42 км. Белгалду, уж балхаш дӀахьош да, «Вахара хьалаш» яхача къаман проекта чудоагӀаш.