МагӀалбика кхале хий чудаьннача моттигашка болх бир
22.04.2024 11:38
Мехкадас Келаматанаькъан Махьмуд-Ӏаьлас тӀадилла, Йоккхача Ачалкхе хий чухьийддача моттигашка хьожаш хилар МагӀалбика кхаленна кулгалду Къоастой Ӏаддал-Хьамиди Паччахьалкхен Думан депутат Татренаькъан Муслими.
«Лермонтова урам тӀа бахача наьха коашка, цӀеношка чудаьннад хий. Ши шу хьалха Татренаькъан Муслима цу гӀулакха лаьрхӀа рузкъа къоастадаь, оттадаь хиннача сунтах тӀехдахад хий.
Наьха ковнаш хих диза латт», - дийцар «Сердалога» Къоастой Ӏаддал-Хьамида.
Йоккхача Ачалкхе санна хий чудаьнна моттигаш я Аьккхий-Юрта, Заьзгакъонгий-Юрта. МагӀалбика кхален хьакимаш цигара хьал меттаоттаде арабаьнна лел.
