Йоал дӏаялара болх боаггӏача боараме хьаоттабе гӏерташ, рейдаш дӏакхухь Магӏалбике
Шахьарерча мах беча моттигий балхага хьожаш, рейд дӏаяхьа араяьлар цу оагӏонцарча балхах йола Магӏалбика кхален комисси. Паччахьалкхен хьалхашкара шоай декхараш бизнесменаша мишта лораду тохкаш бар уж. Къаьстта терко йир йоал дӏаялара, бизнес лелаяр бокъонца каьхаташца чӏоагӏдаьдий тахкара. Белгалде деза цу тайпара болх шахьаре каст-каста дӏакхухьаш болга.
«Магӏалбика кхален администраце, йоалах болча оагӏон болхлой кхален моттигашка цхьацца хӏама йохкачар гӏулакх тохкаш хилар. Бизнес лелаераш деррига каьхаташ лертӏа долаш, ханнахьа йоал дӏачулуш, иштта кхыдола, ӏаьдалцара гӏулакхаш боаггӏача боараме лорадеш хила беза. Иштта йола рейдаш шахьаре, кхален юрташка массахана еш я», - дийцар «Сердалога» Магӏалбика кхален администраце болхлоша.
Кхоачамбоацараш юстардаха дезилга, йоал ханнахьа дӏачуяла езилга хьалхадаьккхар бизнесменашта. Из болх дӏахо дӏахьоргболаш ба администраце. Моттигерча ганза хӏама тоадалар йоал дӏателарах латташ да, из теркалдеш шоай декхараш бехктокхаме кхоачашдеш хила беза бахархой. Вахара оагӏонцарча программашка, шахьарера моттигаш тоаеш, иштта кхыдолча лоархӏамеча гӏулакхашка дӏадодаш ахча да из.
