Кхача лертӏа, кхераме боацаш бий тохкаш хилар Магӏалбике
Магӏалбикерча тикашка, базар тӏа бохкаш бола кхача лертӏа болаш, наха кхераме боацаш бий тахка арабаьлар. Шахьарерча прокуратуро тӏадилла кхален администраце дӏахьош болх бар из. Роспотребнадзора, Россельхознадзора болхлой бар рейд дӏахьош хиннараш.
«Бохкаш болча кхачан хьал боаггӏача боараме лорадеш дий техкар комиссе. Цу юкъе дар хӏара кхача кхераме боацаш хилар белгалдеш дола каьхаташ хилар, хӏамаш тӏа мах оттабар, иштта санитарни хьал лорадар. Нахага бохкаш бола моллагӏа кхача боаггӏача боараме лорабеш, лертӏа хилийтара, наьха унахцӏенон зе ца дайтара тӏехьа дӏакхухьаш я иштта йола рейдаш. Цу оагӏонца дувзаденнарашта йоккха терко еш, шоай тикашка латта кхача майрра эца йиш йолаш бий ховш, хила беза хӏама йохкараш», - дийцар «Сердалога» Магӏалбика кхален администраце.
Цхьацца йолча моттигашка кхоачамбоацараш долга гучадаьхар цу балхо. Шахьарерча прокуратурага дӏакхоачийтаргда цу гӏулакхах дола каьхаташ. Гӏалатбаьннарашта духьала административни гӏулакх хьаделла тарлуш болх ба из. Хӏаьта Магӏалбика кхален администраце иштта йола рейдаш хан-ханнахьа дӏакхахьа лаьрхӏа ба, массайола кхача бохка моттигаш чулоацаш.
