ТӀема операцена юкъе вахар хаьдарий дезалашта, кхачан яьшкаш дийкъар МагӀалбика кхале
Украинерча тӀема операцена юкъе вахар хаьдача бӀухой дезалашта, кхачан яьшкаш йийкъар тахан МагӀалбика кхале. Вай мехкадас Келаматанаькъан Махьмуд-Ӏаьлас соцам баь, гӀалгӀай паччахьалкхен 100 шу дизара хетадаь беркате гӀулакх да из.
«Къаьстта тахан, вай къаман къонгаш Даьхе лораеш латтача хана, ГӀалгӀай паччахьалкхен 100 шу дизар барт, цхьоагӀо хиларца дувзаденна хила деза. ТӀема операце доакъашхой дезалий хьал теркалдеш, царна могаш дола гӀо лоаттадеш хила деза вай массахана. Деналах бизза хиннача цу наьха дезал хьаллацар вай лоархӀаме декхар да!» - аьлар вай Мехкадас. Шекар, хьоар, даьтта, чай, мерза даараш, иштта кхыбола кхача чубола тӀормеш дӀадийкъар царна.
«ТӀема операцена юкъе вахар хаьда тхоай къонгаш къамо бицбеш цахилар, уж дагалоаттабар лоархӀаме да тхона тахан», - аьлар тӀема доакъашхочун цӀагӀарча цхьан вахархочо.
