Лейлас аьнначох, цар кхуврча болхлоша хьайбай лорашца, из болх мишта дIабахьа беза дийца, нисдаь латташ да. «Оаха бахархошка дехар ду, хьайбаш лувчаде эцаш йола молхаш миччахьара а ца ийеш, лицензи йолаш болх беча аптекашкара сертификатага, арахийцача ханага хьежий эца яхаш.

Молхай каьхата тIа яздаьча бесса хила деза, бежан цунца лувчадар. Нагахьа, цхьацца хIама ца кхетадеш болх хуле, хьайбай лорагара гIо деха. Цул совгIа, геттара чIоагIа лорабала беза бахархой, фашгарг хьалатарах, из бежан лувчадеча хана.

Цу гIулакха лаьрххIа барзкъа дийха, кулгахйоахкоргаш ехка, бе беза из болх. Фашгарго церг теха нийслой, Iалаьмате чехка дарбанче дIаваха веза», — дийцар пхьерча администраце. Кхузнаькъан Къамбулата белгалдир, юртбоахамашка, фермашка мел дола доахан, шоай ханнахьа молхашца лувчадеш леладе деза аьнна.

Фашкаргаш яржаш йола ха дIаяллалца, из болх геттара чIоагIа тIахьожам беш дIабахьа беза, аьлар администрацен кулгалхочо.