«ГӀалгӀайчен Кулгалхочо Келаматанаькъан Махьмуд-Ӏаьлас амар даьд, Беза Рамадан бутт хьатӀабарца дувзаденна.

ГӀалгӀайчен паччахьалкхен Ӏаьдала органашка, моттигерча доал деча даькъ тӀа, урхалленашка, организацешка Рамадан бутт болаш, марха кхоабаш болча наха аттагӀа хургдолаш, цхьан сахьата балха ди лоацдергда»,-йоах хоамо.

Иштта къаьстта терко ергья деза мархий денош долаш ток, газ, хий цахадаш лоаттадара.

Кхачан продукташ йохкарца бувзам болаш мел болча наха хьалхадоаккх, хӀара дийнахьа 23 сахьат 00 минот яллалца болх бар, цул совгӀа, маьхаш тӀацадеттар дех кхачан продукташта.

Мехка юртбоахама министерствос, хьалха дӀадахача шерашка санна, «Кавказ» оалача федеральни машина наькъа йистерча маьждигашка марха даста Ӏалашо ергья, машинашца боагӀача наьха шоай ханнахьа марха даста таро хургйолаш. Цул совгӀа, Рамадан бутт болаш республике дӀахьоргья ярмаркаш, ГӀалгӀайчен бахархой, хьаьший таро хургья шоашта эшаш йола кхачан продукташ цигара эца.

Из деррига а деш да, цу дезача деношка дин гӀулакх дизза наха чакхдоаккхаргдолаш, дикача гӀулакхашта вай уйлаш тӀаерзаергйолаш.