«ГIалгIайчен киноговзал» яха гойтам ба МКЖР хьабийлла
Российски кинон Денна хетабаь гойтам ба вай республикерча мехкахбаьхачар Мемориале хьабийлла. «ГIалгIайчен киноцара говзал» яхача оагIонга гIолла, кинобалхаца цIихеза хиннача вай мехкахой вахара никъ бовза аьттув ба мехкахой.
«Тахан ГIалгIайчен кинематограф кердача, боккхача наькъ тIа гIа баьккхарех я, хIаьта цу дерригнена хьалха доккха, кIоарга истори латт.
Дукхача шерашка истореца дувзаденнача цхьацца бахьанашка гIолла, доккхача кинобалхашта юстара хиннай вай республика. ХIаьта а гIалгIай начIал долча наха карагIдаьннад ерригача союза, ерригача Россе оагIонца хьажархой дог дошаде, шоай говзал гойта», - йоах «Сердалога» гойтама хьалха латтарашкара бенача хоамо.
Киноисторе йоккха, лоархIаме лар юташ лаьттарех доаккхал деш ба тахан мехка. Цу оагIонца йизза моттиг дIалаьца дIаэттаб цIихеза сценаристаш, киноведаш Котанаькъан Берд, Iоахашканаькъан Шамал. Кино кхоллача балхаца дикка белгалваьннарех ва Мамилганаькъан Сулумбик, хIаьта экрана тIа массанена дика бовзаш бар лакха начIал дола актераш Наурбенаькъан Руслан, Янданаькъан Тамара, Цисканаькъан Мухьмад, иштта кхыбараш.
