«Ханашта юкъера дийна бувзам» яха гойтам дӀабихьар вай музее
15.02.2024 12:03
«Ханашта юкъера дийна бувзам» яха гойтам дӀабихьар, Малсаганаькъан Тухана цӀерах йолча музее. Лакха начӀал долча Олганаькъан Марема тамашийна хоза кхелла балхаш да цига хьокха оттадаьраш. Тайп-тайпара сурташ, цӀагӀа лелаю дукха хоза хӀамаш я гойтаме.
«Вай къаман истореца дувзаденна беркате балхаш да гойтаме хьажархошта гургдараш. ДӀаяхача ханацара бувзам кердабоаккхаш, говза хӀамаш я Марема ший кулгашца хьаяьраш», - дийцар тха газетага музея кулгал деча Саганаькъан Мухьмада.
Бувцаш бола гойтам таханара ха дӀаяхача ханаца ювзаш ба. Вай къаман Ӏадаташ, оамалаш гойташ болх ба Марема баьр.
Гонахьара Ӏалам, гӀалгӀай вахарцара дукха оагӀонаш гучайоах цу балхаша.
