«Осканаькъан С.С. - Россе турпал» яха гойтам хьабийллар вай музее
Малсаганаькъан Тухана цӀерах йолча паччахьалкхен музее, дӀахьош ба Россе турпалхочоа, вай мехкахочоа Осканаькъан Сулумбика хетабаь гойтам. 32 шу даьлар Липецкерча фецарча тӀема низий кийчо еш хиннача оагӀон кулгал деш хинна авиаце инарал-майор, СССР тӀема низий воккха говзанч, тӀема Ӏилман кандидат, Россе хьалхара турпал Осканаькъан Сулумбик вайцара къаьста.
«Тха гойтаме хьокха оттадаьд цун сурташ, цо хьабена никъ бувцаш йола статьяш, книжкаш, турпалхочун хинна хӀамаш. Царга гӀолла дикагӀа бовзаргба цун бӀаьхий хинна турпалхочун никъ», - дийцар «Сердало» газетага музея кулгал деча Саганаькъан Мухьмада.
Сийдолча вай мехкахочо дерригача дуненна гойтар хам баь варгвоаца денал, майрал да. Вай дегашта цӀаккха а дицдала йиш ярех дац уж! Турпалхочун цӀи тӀехьенаша тӀехьенашка телаш, яха еза вай дегашка, дуккханешта масал долаш.
Вай къаман цӀи дӀахазийта, сийдолча оагӀорахьара вай дӀахьекха саг ва Сулумбик.
