ГӀалгӀайчен мемориале, зӀамагӀа болча дешархошта экскурси йир
ГӀалгӀай къам мехкахдаккхара дагалоаттама мемориала гӀишлошка гӀолла, Наьсарен №16 йолча ишкола зӀамагӀа долча берашта лаьрхӀа экскурси йир. Из дар «Дешархошта - культура» яхача болама юкъерча культуран дешара проекта чудоагӀаш.
«Вай музея керте латтача Торенаькъан Любас берашта дийцар музей, цун экспонаташ, коллекцеш йовзийташ дола къамаьл, иштта царна йовзийтар музея бокъо. Цул тӀехьагӀа берашта гойтама залашка экскурси йир, берашта из, дицлургдоацаш, дег чу дисар», - аьлар «Сердало» газетага мемориала болхлоша.
Ерригроссе «Дешархошта - культура» яха проект лаьрхӀа я берашта, кхувш боагӀачарна искусство, культура дикагӀа йовзаргйолаш. Цун декхар да массе оагӀорахьара культуран тӀехьален мах бараш царна довзийта, иштта из кхычарга дӀадала Ӏомабар.
Проекта чудоагӀаш, ГӀалгӀайче тайп-тайпара кхетаченаш-экскурсеш, лекцеш, говзанч-классаш, гойтамаш дӀахьу. Из бахьан долаш, бераша дикагӀа Ӏомаду хьамсарча мехка истори, иштта йовз цун культура, искусство.
