«Безамца книжкаш ле» яха болам дIабихьар къаман библиотеке
«Безамца книжкаш ле» яхача ерригача Россе ворхIлагIча болама хетаяь, книшкаш совгIата телаш йола кхетаче дIайихьар вай къаман библиотеке. Беркате гIулакх хинна, ерригача Россе дIа-хьа баьржаб из болам. Укх наькъа, Илдарха-ГIалий тIара, Шолжа-Шахьарера кхо ишкол я цига дакъа лоацаш. Хьехархойи, дешархойи гулбелар библиотеке, из хоза гIулакх хьаллаца.
«Илдарха-ГIалий тIарча № 6 йолча ишкола, Шолжа-Шахьарерча шин ишкола, хозача совгIата хьисапе хьоарчадаь книжкаш луш, дIайолайир кхетаче. № 9 йола шахьарера ишкол хьайийлла дукха ха яц, цунга хьежжа, книжкашца царна гIо де эттар №6 йола ишкол. ЧIоагIа хоза хет из беркате гIулакх тхоай библиотеке цар дIадихьа», - дийцар «Сердало» газетага къаман библиотекан болхлоша.
Книжкаш совгIата телача къамашта юкъерча денна хетабаь кийчбаьча гойтамга хьежар хьаьший. ГIалгIай, эрсий, доазол дехьарча къамий берий толашагIа дола литература дар хьокха оттадаьр.
Библиотеке гIолла экскурси еш, цу чура вахар довзаш, дIайихьар гулбеннараша шоай ха.
