Наьсарерча Ӏама гонахье тоаеш, болх дӀахьоргба мехка
Дукха хьийжа, сатийса, Наьсарерча Ӏама гонахьара моттигаш меттаоттаеш бола болх дӀаболабергба мехка. Федеральни оагӀоно гӀо дарах йолча яхьашка, шахьара администраце котало яьккха баьнна аьттув ба из, Даьла къахетамца. «Сердалога» из хоам бу шахьара администраце. Мэр волча Оздой Руслана белгалдечох, Ӏама гонахьара моттиг дӀашеръеш дола балхаш дӀадоладаьд.
«Тоаяь яьлча, наха паргӀатта салаӀа йиш йолаш моттиг хургья из, цул совгӀа, шахьара куц хоздергда цу хвцамаша», - аьлар мэра.
Ӏама гонахьара доазув дӀашердарал совгӀа, керда наькъилгаш дохкаш, еррига лампаш хувцаш, керда кхуркхолг оттабеш дикка къахьегаргда цига. Иштта цу доазон тӀа хьаделла лерхӀ ахканара кинотеатр, кхетачеш дӀакхухьа доазув. Гонахьара карт, бераш ловзаш йола моттиг тоаеш, керда брусчатка Ӏобуллаш болх чакхбаккха лерхӀ цига, Даьла низаца.
Проекта чудоагӀараш ма дарра гуш хургдолаш, вахара оагӀонашка гӀолла гойташ хургба болх. ХьатӀадоагӀача кӀира дӀаболабала лерхӀ гилакемаш сувцаргдола моттигаш хьалъе, хий долча ӀакӀалвала йиш хургйола гӀирсаш оттаде.
