2024-ча шера Наьсаре тоае еза моттигаш къоастайир
Шахьара куц тоадара тӀехьа кхеллача беркатеча программага гӀолла, дукха шахьараш тоаеш латт Россе. Цу программага гӀонца дӀахьоча балхо дукха дика хувцамаш юкъедоаладаьд Наьсаренна. Укх шера тоае езача моттигаш къоастайир шахьаре. Из хоам «Сердало» газетага бир администраце.
«Эггара хьалхарча аргӀагӀа тоае лерхӀ, бахархоша шоаша хержа моттигаш. Цу юкъе я № 8 йолча цӀен духьалара Базорканаькъан оалача проспектера сквер, Наьсара-Кертера Дидиганаькъан, ЦӀечой цӀерах долча урамашкара сквераш. ДӀахойола моттигаш тоае лерхӀ 2025-ча шера. Уж я шахьарерча Ӏама гонахьара моттиг, Алханчуртски канала дӀоахала улла никъ, Хамхой, Арчакханаькъан цӀераш лелаю урамаш», - йоах тхогарча хоамо.
«Укх шера кхо моттиг тоае лерхӀ оаха Даьла низаца, хьатӀадоагӀача шера - йиъ. Бахархошта бакъахьа хетача тайпара дӀабахьа гӀерт тхо цу программацара болх. Шоашта нийсагӀа хетар оалаш хила, хӀара сага бакъахьа хетар тохкаш да тхо», - белгалдир шахьара дас Йовлой Урусхана.
2030-ча шерга кхаччалца, из программа дӀаяхьа аьнна, соцам баьб РФ президента Путин Владимира.
