Наьсарерча Пионерски оалача урама хьал тохкаш хилар шахьара да
19.08.2025 11:56
Наьсарерча Пионерски оалача урам тӀара вахархо леткъа, цу моттига хьал тахка араваьнна, цига бахаш болча нахаца къамаьл дир шахьара да волча Оздой Руслана. Из хоам «Сердалога» бир мэре.
«Бахархошца къамаьл деш, цо теркалдир берашта ловза къоастадаь доазув хила дезилга, гӀашлой никъ билла безилга, маьждига юхе лампаш эшилга», - йоах тхогарча хоамо.
Оздой Руслана белгалдир, укх шера доккхий балхаш кхоачашде вӀаштӀехьа доацилга, бакъда тӀаьна дӀатӀаотташ йола моттиг тоаергья гӀашлой никъ билла, лагӀаш даь, иштта теркаме лоацаргда маьждига юхерча моттигаца дувзаденнараш.
Бахархоша дехар дир; Мира оалача урам тӀарча наькъ тӀа даьнна кӀоагаш дӀадукъаш болх бе, аьнна. Цу оагӀонцарча кулгалхочунна тӀадиллар мэра, из дехар кхоачашдар.
