Керда ишкол хьайийллар Наьсаре
Тахан Наьсаре керда ишкол хьайийллар. Цига дакъа лоацаш хилар вай Мехкада Келаматанаькъан Махьмуд-Ӏаьла, иштта видеогойтаме гӀолла дакъа лоацаш вар дешара оагӀонцарча гӀулакхех вола министр Кравцов Сергей.
«Шийна хьалхашкара декхараш дизза кхоачашдара масал гойташ я тахан республика кхыдолча мехкашта. Дог тийша ва со, 2030-ча шера мехкара еррига ишколаш боаггӀача боараме болх дӀахьош хургхиларах», - аьлар Кравцов Сергейс.
Министра белгалдир, ишколе Сийлахь-боккхача Даьймехка тӀема турпалий, СВО турпалий вахарах гойташ музей хьаелла езилга. Кердача ишколе беррига кхоачам ба, хьайийллай аьшкаца, дахчанца болх беш йола пхьоалле, робототехниках йола класс, иштта хӀамаш тега, даа хӀама кийчде йиӀигаш Ӏомаеш йола моттиг.
250 сага моттигаш луш йола кхетачен зал тӀехдика тоаяь латт, дегӀа могашал эшаеннарашта лаьрхӀа пандусаш, лифт да ишколе.
«Республикерча йоккхагӀа йолча шахьаре иштта беркате ишкол хьаеллар хам баь варгвоацаш доккха дика да. Кхыйолча ишколай хьал дикка паргӀатагӀа хургда керда ишкол хьаелларца», - белгалдир вай Мехкадас Келаматанаькъан Махьмуд-Ӏаьлас.
