Наьсарерча Буражанаькъан урам тӀа керда сердал хургья
«Эллин» яхача ишкола гонахьа бахача нахаца вӀашагӀкхетар дӀадихьар Наьсарерча мэра Оздой Руслана. Бахархошца къамаьл даьчул тӀехьагӀа, хьакима соцам бир, Буражанаькъан цӀерах болча урам тӀа керда лампаш йохка. Из хоам «Сердалога» бир администрацера.
Урама куц тоадеш, лампашта лаьрхӀа бӀоагӀий догӀаш, къахьийгар бахархоша. Бакъда чӀоагӀа тамаш яйташ дар цхьа хӀама - шинна оагӀонцарча бахархоша цхьацца метр лаьтта хьахийцар урам шерагӀа хилийта.
Оздой Руслана баркал аьлар из беркате гӀулакх кхоачашдаьрашта: «Баркал хилда шоана даьча гӀулакхах! Урам вай тоабергба, Дала аьннадале. БӀоагӀий дӀанийсдаь, керда, хоза лампаш йохкаргья, хӀаьта тӀадоагӀача шера асфальт Ӏобилла хьожаргда вай», - аьлар мэра.
Иштта цу урам тӀа вахача цхьацца юкъара балхаш леладеча Йовлой Къурейшага шахьара Юкъарча кхела доакъашхо хила, аьлар цо. Мэра белгалдир, шахьарах иштта дог лазаш бола нах цу моттига боккха пайда беш хургболга.
