Шахьара куц тоадеш боахк Наьсаре
13.03.2025 10:11
Бизнесменаш цу юкъебахкар хьаллоацаш, шахьара куц тоадеш ба Наьсарера хьакимаш. Шахьара да волча Оздой Руслана белгалдир, шахьара моттигаш боаггӀача боараме, наха паргӀато луш тоаяь хила езилга.
Из хоам «Сердалога» бир администрацера. Шахьара рузкъах, иштта федеральни оагӀонгарча новкъосталца дӀахьош ба из лоархӀаме болх.
«Арбат» яхача парка тӀехьашкара доазув меттадоаладеш боахк болхлой карарча хана. Цу проектага гӀолла тишъенна хин лини хувцаргья, коллектораш тоаергья, иштта хӀама йохкача моттигашта тӀадолхача наькъий куц меттадоаладергда. Шахьара бахархой вахар ма хулла паргӀатагӀа де дӀахьош боккха болх ба из.
