Наьсаре къайлагӀа болх лелабераш гучабоах
Наьсарен-Шахьара Керттерча куран администраце комиссе ший лаьрххӀа йолча аргӀагӀа болх дӀахьу, шахьаре къайлагӀа болх лелабераш, къахьегама бокъонаш чӀоагӀъянза бараш гучабоахаш, яхаш, дийцар «Сердало» газетага дувцача даькъ тӀа зарбан болх лелабераша.
Цул совгӀа, шахьаре мах бара йола моттигаш шоашкара хьайийллараш гучабоах. Иштта болх дӀахьош, бокъо йоацаш хьайийлла мах беш йола кхо моттиг дӀакъайлар.
«КъайлагӀа хьайийллача мах беча моттигашка таро хилац йохкача хӀамай дикалга хьажа, цудухьа уж лелаеш йола моттиг а цунга хьежжа хул. Из болх дӀахьош хилар хьалхарча аргӀагӀа дувзаденна да бахача наха дикал лоха йола товар дӀацакхачийтарца», - аьлар шахьара администраце.
Иштта комиссе лаьрхӀад, цу тайпара болх Тутайнаькъан урам тӀа дӀабахьа; цига, карарча хана, шоашкара дукха хьаеллаш я мах бу моттигаш.
