«Фусамаш, шахьара хьалаш» яхача къаман проектах болх дӀахьу Наьсаре
ГӀалгӀайчен эггара йоккхагӀа йолча шахьаре, Наьсаре, дӀахьош ба «Фусамаш, шахьара хьалаш» яхача къаман проектах беш бола болх.
2024 шера де лерхӀача балхех да Базорканаькъан И. проспектах йола сквер, Дидиганаькъан урамах йола сквер тоаяр.
ЦӀечой урам тӀа асфальт биллара болх йистебаьннаб. ХьалхагӀа оттаяь хиннача сурт-кепах сквера даькъ тӀа балхаш дӀахьош да, яхаш, дийцар «Сердало» газетага шахьара администраце зарбан болх лелабераша.
«Федеральни оагӀонца оттаяь программа кхоачашъеш латт вай мехка, из дика новкъостал а да вай шахьараш дикача оагӀорахьа тоаяра. Из проект хиларах, карарча шера шиъ тоаяь а цаӀ асфальт билла а йола юкъара моттигаш ӀотӀакхеташ я вайна. Цо таро лу дукхача наха дика хьалаш хьакхолла», - аьлар шахьара кулгалхочо Йовлой Урусхана.
