Бокъо йоацача тайпара балхаш леладераш гучабоахаш, болх дӀабихьар Наьсаре
07.02.2024 14:45
Бокъо йоацача тайпара, цхьацца балхаш леладераш гучабоахаш бола болх дӀабихьар Наьсаре цу гӀулакхах йолча комиссе. Из хоам «Сердало» газетага бир шахьара администраце зарбан болх лелабераша.
«ДӀабихьача балхах, 2023-ча шера йоал телача дӀаязвир 238 саг, царна юкъера 160 сага гӀод техар. Комиссена юкъе чуболхараш ба шахьара администраце болхлой, роспотребнадзор, къахьегамах йолча министерствон болхлой, йоалах долча гӀулакхера къахьегамхой, МВД болхлой», - йоах тхога кхаьчача хоамо.
Цу комиссе болх дӀакхухь шахьаре хӀама йохкаш мел йолча моттигашка, кхача кийчбеча, иштта кхыйолча моттигашка а.
