2025-ча шера тоае еза моттигаш хоржаш ба бахархой
РФ президента соцам баь, вIашагIъеллача шахьара куц тоадарах йолча къаман проектага гIолла, 2025-ча шера тоае лаьрхIа Наьсарера йиъ моттиг я. БархI куцаш гойтача проекта юкъера эггара хьалхарча юхьанца тоае езача моттигий хоржам бе безаш ба бахархой. Из хоам тха «Сердало» газетага бир шахьара администраце.
«Шоашта бакъахьа хета цхьацца куцай проект харжа езаш ба бахархой, царнна юкъе ба ГIазе-Коара Хамхой цIерах бола урам, Аьлтий-Юртара Iарчакханаькъан цIерах болча урам тIара гIашлой никъ, шахьарерча Iама гонахьара доазув, Алханчуртски канала гонахьара моттиг. za-gorosreda.ru сайтага гIолла долх хоржамаш», - йоах тхогарча хоамо.
Хьокха оттадаьча сурташа гойт ГIаьзе-Коарча Хамхой цIерах болча урама таханара а, кхоана тоабаь баьлча цун хургдола а куцаш.
