Кхо урам хотташ бола никъ тоабир Наьсаре
Муцолганаькъан, Темарханаькъан цӏераш лелаю, иштта Хьун урам вӏаший хотташ бола никъ тоабир мехка. 800 метрага кхоачаш болча наькъа хьал меттаоттадеш бола беррига болх чакхбаьккха баьннаб болхлой карарча хана.
«Керда асфальт ӏобиллар цига. Цкъа хьалхагӏа кӏалхара кӏийле тоаеш, шаьръеш баьхкар болхлой. Шахьара да волча Оздой Руслана чӏоагӏонца, укх шера тоаде дезача наькъашта юкъебихьаб из урам. Бахархошта лоархӏаме болаш никъ ба из, хӏана аьлча ишкола тӏабодаш ба из, цул совгӏа хӏетта нах баха ӏохайша моттиг шахьарца хотташ ба», - йоах «Сердалога» шахьара администрацера бенача хоамо.
Машинашта, иштта гӏаш леларашта доккха совгӏат да из никъ тоабар. Кӏоагаш доахкаш, телха, наха хало еш бар из хӏанзолца. Наькъий хьал боаггӏача боараме хилар лакха терко еш да мехка. Ювцача моттига куц хоалуш эргадаьккхад кердача наькъо.
