Р - 217 «Кавказ» яхача боккхача новкъа машинаш йолаелар
Наькъий хьал тоадеча оагӀонца дикка толам баьккхаб вай. Р-217 «Кавказ» яхача федеральни наькъа 568 километрага кхоачача доазон тӀа машинаш йолалуш кхетаче хилар. Мехкарча наькъий хьал аттачахьа доаккхаш хургда из лоархӀаме гӀулакх.
«Республикерча бахархоша дукха сатийса, хьийжа ди да из никъ хьабеллар. Наькъаш паргӀатагӀа хилийтарал совгӀа, кхерамзлен оагӀонцара хьал меттаоттадеш хургда из», - белгалдир вай мехкадас Келаматанаькъан Махьмуд-Ӏаьлас. Вайцигарча проектни тоабаша шоай болх лакхача боараме дӀахьош, федеральни оагӀоно гӀо деш, чакхдаьккхад из доккха гӀулакх.
Наькъий хьал тоадарах йолча къаман проектага гӀолла дӀабихьаб болх. Цу проектага гӀолла, хӀирий доазон тӀа дӀатӀаоттачара Ӏоволавенна Эбарга-Юрта Ӏочуотталца, шербе лерхӀ 26 километр бола никъ, шин оасах биъ оаса хьабеш. Цу гӀулакхо наькъашкара хатараш дикка лаьгӀдергда, Дала аьннадале.
Цул совгӀа, проектага гӀолла Магасерча, Наьсарерча, Илдарха-ГӀалий тӀарча наькъашка хувцамаш дергда, керда тӀий тулларгда Шолжа-Шахьаре, иштта гӀашлошта лела моттигаш къоастаеш, автобусашта остановкаш хьалъеш, гӀашлой наькъаш дехкаш, лампаш йогӀаш, иштта кхыдараш юкъелоацаш къахьега лерхӀ.
2026-гӀа шу чакхдала гаргагӀертача хана йистебаьнна хила безаш ба из боккха болх. Цу беркатеча проектага гӀолла, мехкарча наькъий хьал дикка тоаде; экономикан, туризма гӀулакх айде аьттув ба тахан. Керда никъ хьабеллар тахан хьалхара, лаьрхӀачунга кхачара чӀоагӀа лоархӀаме гӀа ба.
