Наьсарерча Ӏам тӀа дӀатӀадоала уйнаш тохаргда, сердал Ӏалашъергья -дӀаболабаьб боккха болх
Наьсарен Ӏам хувцалуш боагӀа: шахьара кулгалхочо Оздой Руслана тӀадиллача декхарах дӀаболабир аргӀанара юкъара доазув тоадара болх. Проект кхоачашъеш я Наьсарен администраци Ерригроссийски яхье котъяьнна хиларах, зӀамагӀа йола шахьараш, исторически нах баха моттигаш тоае дикагӀа йола проект оттаяьй, яхаш, дийцар «Сердало» газетага шахьара мэре.
Таханарча денга кхоачаш итт хи тӀа вала йиш йола уйнаш тохара, иштта хин шиъ бетона гӀирс бара болх дӀаболабаьб. ДӀадоахаргда сердал луш дола тиша боагӀий, цу моттиге хургда таханарча заман дохаде таро йоаца керда сердалон бӀоагӀий.
«КӀимарса бетта лаьрхӀад керда чона карт е, шахьара культуран цӀен хьалхашка дикагӀа йола Ӏоакъа Ӏоюлларгья, къаьнаръяр хьал а яьккха. Цо моттиг хозъергья», - аьлар хоамо.
Цул совгӀа, Ӏама юхе машинаш лоаттае йиш хургйолаш моттиг кийчъеш я, хӀанз дехар даьд хи тӀа хургбола кхуркхолг хьабе.
Шахьара доазув кердадаккхаро Ӏам хозагӀа хилийтарал совгӀа, шахьара бахархошта аьттув болашагӀа а бергба.
