Павловни оала 200 га дӀайогӀа лерхӀ Наьсаре
07.11.2023 21:53
Керда гаьнаш дӀайогӀаргйола моттигаш къоастаеш хилар Наьсаре. Павловни яха Дала хоза куц денна гаьнаш дӀайогӀа лерхӀ шахьарерча Ӏама гонахьа, Столични оалача урамерча аллее, лицейна юхерча сквере. Из хоам «Сердало» газетага бир шахьара администраце.
«Шахьара бахархой цу хӀаман юкъе дакъа лаца тӀахьех администраце болхлоша. Гаьнаш дӀаегӀача бакъахьа хета моттигаш наха белгалйоахе, из доазув цу гӀулакха юкъелаца йиш йий тохкаргда оаха», - йоах тхогарча хоамо. Павловни яха га эггара хозагӀа лоархӀача гаьнех я, цул совгӀа, геттара сиха йоккха хулаш, Ӏалама эшаш я.
