Юрташкарча наькъий хьал цахаддаш меттадоаладеш ба Наьсарен кхале
Вай мехкадас Келаматанаькъан Махьмуд-Ӏаьлас тӏадилла, наькъий хьал меттадоаладеш болх ба Наьсарен кхале дӏахьош. Кхален кулгал деш вола Овшанаькъан Мухарбик ше ва цу гӏулакха тӏахьожам беш. Буро кӏалха ваха, цу юрта тоаде дезача наькъий хьал тохкаш хилар из балхарча тоабаца.
«Местой цӏерах болча ураме наькъашкара кӏоагаш дӏадукъаш къахьегаш боахк карарча хана. 1,5 километрага кхоачача доазон тӏа болх дӏабахьа безаш ба уж. Магистральни оалача цхьаькха ураме, жагӏа тоссаш, никъ нийсбе лерхӏ. 400 метрага кхоачаш да из доазув. Овшанаькъан Мухарбика белгалдир, болх боаггӏача боараме, цхьаккха кхоачамбоацараш гучадаргдоацаш чакхбаьккха хила безилга. Бахархошта, машинашта паргӏатагӏа хургйолча тайпара хийца хила деза наькъий хьал», - дийцар «Сердалога» Наьсарен кхален администраце.
Бахархошца бувзаме болаш, наькъашкара кхоачамбоацараш юстардоахаш болх ба тахан хьакимаша дӏахьош латтар. Наькъий хьал лертӏа хила деза, из керте оттадеш, тӏатеӏӏа, къахьега лаьрхӏа ба кхален администраце.
