Iилма-тохкама институте Хьоашаланаькъан Ӏаьлий кхоллам бийцар
08.11.2023 11:27
ГӀалгӀайчен поэт Хьоашаланаькъан Ӏаьла ваь 80 шу дузаш хилара хетаяь яр, Ӏоахарганаькъан Ч.Э. цӀерагӀча ГӀалгӀайчен Ӏилма-тохкама гуманитарни Ӏилмай институте дӀайихьа семинар. Ӏилман кхетаче дӀахьош дакъа лоацаш бар ГӀалгӀай паччахьалкхен университета студенташ.
«Хьоашаланаькъан Ӏаьлах тешшаме ала йиш я, из халкъа юкъара мах бола ганз я, аьнна. Цо сий долаш дӀабихьар шийна хьалхашка нийсбенна халоний никъ, ше хержача нийсхонна наькъ тӀара ца воалаш, хьавенарех ва из, кортамукъаленах боккха мах дӀабенна саг ва. 24 шу дӀадаьннад из вайцара дӀакъаьста, сийдола поэт, гражданин, патриот, кӀоарга уйлаш йола саг вар Iаьла. Цун кхоллама тӀехьале тахан кепа теха еце а, Ӏилман терко чӀоагӀа тӀаозаш я», - аьлар «Сердало» газетага Ӏилма-тохкама института кулгалхочо, филологе Ӏилмай доктора БӀарахой Нинас.
