Дешара моттигашка дӀаболабаьб, терроризма духьаллатта Ӏомалуш бола болх
Ерригроссийски Ӏомабалар дӀадоладалар хьакхайкадир Россе дешара министра Кравцов Сергейс, МЧС кулгалхочунца Куренков Александраца, МВД, Росгварде, Рособрнадзора викалашца цхьана. Цун маӀан да хьехархой, ха тӀа латтарий, берий болх дика вӀашагӀболлар; нагахьа санна терроризма хьал отташ хуле е кхерам болаш моттиг нийслойя, яхаш, дийцар «Сердало» газетага мехка дешара министерствон зарбан болх лелабераша.
Ӏомабалар дӀадолалуш, видеога гӀолла бувзам оттабир Ерригроссийски кхетаченца. Цига дакъа лоацаш вар ГӏалгӀай Республикан дешара, Ӏилман министр Цхьорой Ахьмад-Башир. Доакъашхоша дийцар, кхераме хьал эттача де дезачох, сихача гӀонца болх мишта вӀашагӀболла беза.
Кравцов Сергейс белгалдир, технически оагӀорахьа кийча хиларал совгӀа, психологически а духьалъотта кийча хила безилга.
Ӏомабалар хилар, бекарга бетта 29-ча денгара 30-ча денга кхаччалца, цу юкъейоагӀаш яр берригача мехкара ишколаш.
