«Кхетаче дакъа лоацаш хилар Халкъа Гуллама вахара политикахи, унахцIенон гIулакхехи йолча комитета кулгалду Горчхананаькъан Беслан. Цига дийцар республикерча унахцIенон хьалах, кхоачамбоацарех, хьалхарча аргIагIа де дезарех, онкологически лазарашта духьала дIабахьа безача балхах», - йоах тхогарча хоамо.

Ужахьанаькъан Сулеймана дийцар, таханарча дийнахьа цу халача лазаро лаьцача наха лоаттадеча дарбах, молхай кхоачамах, шоай аьттув баьннарех, дIахо дIабахьа безача керттерча балхах.

Парламента спикера белгалдир, тахан цу лазара духьала ма могга къовсам лоаттабар, вайна массанена чIоагIа лоархIаме да, аьнна. ТIумхой Мухьмада дийцар; республикан хьалхалаттараша тахан боккха болх дIакхухь вай унахцIенон хьал тоадара тIехьа, аьнна. Академика Савицке А. цIерагIа йола преми луча яхьашка цо котало яккхарах, даькъалавийцар из парламента спикера.

«Укх шерара хирург - 2023» яхача оагIонцара котало кхаьчай вай лорага. Беркате, аьттув болаш хилба цун никъ!