Цига дакъа лоацаш хилар, къаман гуллама депутаташ, унахцIенон министерствон кулгалхочун гIонча йола Настайнаькъан Аминат, РосунахцIенон тIахьожама кулгал ду Боранаькъан Ахьмад, Роспотребнадзора кулгалхочун гIонча ЦIолой Майя, кагирхой парламента хьалха латта Аспинаькъан Адам, кагирхой парламента доакъашхой.

Кхетаче хьаеллаш, Горчханнаькъан Беслана белгалдир, полиомиелит яхача лазара духьала маьхий тоханза бераш вай мехка дукха долга. Из дувзаденна да, ноаной уж тохийта раьза цахиларца. Цо теркалдир, лазар ца даржийтара эггара хьалха де доагIар маьхий тохар да, аьнна.

Кхетаче дийцачох, из гIулакх чоалхане дерзарах, вай республике, черсий мехка, селий мехка, нохчашкахьа кхаь беттагара итт шерга кхаччалца долча берашта маьхий тоха аьнна соцадаьд. Полиомиелит ца даржийтара тIахьожам лоаттабеча вай мехкарча лораша даьккхача оарцах, федеральни оагIоно баь соцам ба из.

Цу тайпара болх бе беза ха къоастаяьй: укх бетта 27-ча денгара бIаьстан хьалхарча бетта 5-ча денга кхаччалца, бIаьстан шоллагIча бетта 3-ча денгара 9-ча денга кхаччалца. Цу гIулакхах болча болхлоша яхачох, тIаккха полиомиелит яха лазар даржаргдац вайцига.

Таханарча дийнахьа цу тайпара бераш 73 721 кхоачаш да вай мехка. Шоашца лораш болаш, цIагIа дIаухаш, маьхий тохаргдола тоабаш вIашагIъехкай вайцига.

Гулбеннараша белгалдир, уж тохалехь берага лор хьажийта везилга. Цул тIехьагIа мара маха тоха йиш яц. Иштта белгалдир, молха лораяр ший боаггIача боараме хила деза, аьнна. ЙоаггIаш йола температура лораеш, молхаш шийлалорга чу йоадаяр эггара лоархIамегIдар да цу гIулакха юкъе.

Из гIулакх тIахьожам беш дIахьоргда, аьнна, чIоагIо йир. Депутаташа хьоахадир, бакъдоацача къамаьлашка ладувгIаш, ноаноша берашта маьхий ца тохийтара гIулакх бакъахьалга даккха деза, аьнна.

«Берий цIагIарча наха ха деза, полиомиелит яха лазар дегIа мел доккха зе деш да. Из дарба дулуш лазар дац. Цкъа из хьакхийттар, кхы когаш тIа ураотта низ болаш хургвац. Из хьалхадаккха деза ноаношта», — аьлар Олиганаькъан Бадрудина.