Курски дукъ оалача моттиге моастагӏа вохавеш лаьттараш, дагалаьцар Дола-Коа
1943-ча шерарча маьцхали бетта 23-ча дийнахьа Курски тӏема юкъе фашист вохавеш, ше вай лаьтташка чугӏортарах дехкевоаккхаш лаьттача советски бӏухой турпалал дувцаш, кхетаче хилар Дола-Коарча культуран Цӏагӏа.
«50 ден-бус – кӏимарса бетта 5-ча денгара маьцхали бетта 23-ча денга кхаччалца лаьттача цу лирача тӏемах дийцар кхетачен кулгал деш хиннача Алерой Шамхана. Сийлахь-боккхача Даьймехка тӏема юкъе лоархӏаме моттиг дӏалоацаш хилар из. Шинна оагӏорахьара дакъа лоацаш хиннараш 4 миллион совгӏа саг вар, 13 эзар совгӏа танкаш, 12 эзар гаргга фецара кемаш», - йоах «Сердалога» цу моттигера бенача хоамо.
Къаьстта лоархӏаме моттиг дӏалоацаш бар 1943-ча шерарча ахкан шоллагӏча бетта 12-ча дийнахьа Прохоровка оалаш хиннача моттиге юхе этта цӏихеза танкови тӏом, иштта Орёл, Белгород, Харьков яхача шахьарашкара моастагӏа араваккхар. Таханара маьрша вахар хьаоттаде гӏерташ, фашиста наькъаш тедаш, цун операци йохаеш лаьттараш дагалаьцар кхетаче.
