ТӀем тӀа гӀалгӀай лётчико лелаяьча самолёта оатхалаш кораяьй Псковски областе
ГӀалгӀайченна хьалургья, ардара бетта 21-ча дийнахьа, Псковски областа Новосокольники яхача шахьаре кораяьча Як-7Б истребитела оатхалаш. Цун лётчик хиннав зӀамагӀа вола лейтенант, Россе Турпал Оздой Мурад.
Дукха ха йоацаш дӀабихьача тохкама балха гучаяьлар, 1944 шера чудахача фецарча кеман оатхалаш уж хилар.
Цун мотор корабаьб, из лоархӀаме да, хӀана аьлча къаьстта цу тӀа яздаьд из гӀалгӀай летчика хинна истребитель йолга.
«Патриот» яхача ГӀалгӀай Республикан РОО тохкама тоабо хьалехар РФ Миноборона Центральни архиве цун каьхаташ, цига гуш хилар цунах бола хоам. Архиво каьхат хьаделар, хьалхагӀа ца хиннача хоама тешал деш.
«Тохкама тоабо къахьегарах, таханарча а иштта кхоанарча а тӀехьено доаккхал а деш лелабергба, Даьхе лораеш лаьттараш, цар сий лакха лоаттадергда.
Оздой Мурада гойтад денал, тӀема говзал йолаш саг ше хилар. Цо, сигала тӀом беш, дукха толамаш даьхад. Из даим вахаргва вай дегашка», - аьлар ГӀалгӀайчен кулгалхочо Келаматанаькъан Махьмуд-Ӏаьлас.
Хьалхара гучаяьнна истребитала оатхалаш хьаеннаяр вай республиканна 2012 шера. Цул совгӀа истребитель белгалйир, из ГӀалгӀачун хилар чӀоагӀдеш, 2010 шера.
Иштта дале а, хӀанз мара цун чӀоагӀо янзар, къаьстта из Оздой Мурада хинна Як-7Б хилар гойташ.
