ГӀалгӀайчен РДНТ, гӀалгӀай мехкахбаьха 80 шу дузаш, дагалоаттама сайре дӀахьоргья
ГӀалгӀайчен халкъа кхоллама ЦӀагӀа, Сталина гӀалгӀай къам мехкахдаьккха Юкъерча Азе, Казахстане Ӏодахьийта 80 шу дузаш хилара хетаяь, «Вай дицде йиш яц» яха дагалоаттама сайре дӀахьоргья. Цига керттера хургья, РДНТ исбахьален кулгалхочун АбдурзаковгӀар Аьсета литературно-ашарий композици.
«Оаха белгалдергда, Cталина тийшаболх барах гӀалгӀай къаман тӀаэтта хинна Ӏазап, цу хана Сийлахь-боккха Даьймехка тӀем тӀа моастагӀчох латаш, вай къаман къонгаш хилар. Уж, денал долаш, тӀема мугӀарашка латтача хана; из унзара хоам царна тӀем тӀа хеза хиларах дувцаргда. Литературно-ашарий композице гӀалгӀай къам юха мехкадалара бӀаьха никъ бувцаргба, уж шоай вахара овла болча кхачарах а дувцаргда.
Юххера а, белгалдергда, кастта гӀалгӀай паччахьалкхен 100 шу дузаш хиларга тахан кийчо еш хилар. ГӀалгӀай къаман карагӀдаьннар дувцаш, Россе Президента В.В. Путина белгалдир: «ГӀалгӀайче - хоза культура, Ӏадаташ, начӀал дола нах баха лаьтта да. Оаш доккхал де деза дукхача денал долча ноахалах, Ӏилманхоех, паччахьалкхен болхлоех, боккъонца болча къахьегамхоех, культуран, искусствон болхлоех, цар юкъеденад ерригача Россе, хьамсарча мехка исторен дакъа…», - аьлар «Сердало» газетага ГӀалгӀайчен халкъа кхоллама ЦӀагӀа.
