Хоам бу 2022 шера - 2031 шерага кхаччалца РФ Президента тIадилларах Ерригача Россе гIолла юртбоахама лаьтташ пайда эцаш леладареи, иштта мелиоративни комплекс дегIайоалаяраи паччахьалкхен программа дIайолаяьй. Из Россе юртбоахама министерство тахка, Правительства Председатела Мишустин Михаила дIачIоагIъяьй.

ГIалгIай республика юртбоахама министерства Калиматанаькъан Махьмуд- Iаьлас хьалхашка оттадаь декхар дар из кхы а кхо шу хьалха, юртбоахама лаьтташ пайда эцаш леладар аьнна. Уж деррига лаьтташ кадастрови учете оттадеш да. Цу дерригне таро хулийт юртбоахама продукци арахецача наха дезаш дола лаьтташ дIадекъа а иштта АПК инвестораш тIахьеха а .

Лакхехьа белгалъяьккхача госпрограммо таро хулийт- малагIа лаьтташ мичахьа дадаш да ха а, цул совгIа уж фу лаьтташ да ха а, иштта цутIара малагIа пайда эца йиш я ха а. 13,2 млн гектар юртбоахама лаьттах пайда эца йиш я, из доацаш а 3,6 млн гектар мелиорировани лаьтташ доалахьара даргдоацаш лораде. Цул совгIа лерхIаш да агролесо-, фито-химе мелиораци е 2,8 млн гектара тIа, иштта 1,35 млн гектара тIа гидромелиоративни система хица Iалашо е. Из деррига а кхоачашдара федеральни бюджетера 2031 шерага кхаччалца 500 млрд сом дIадахийта лаьрхIад.