«Рамадана чаьтар чу» дӀахьоргья сайре
Москверча Поклонни гув оалача моттиге тушола бетта 16-ча дийнахьа дӀахьоргья ГӀалгӀайчен сайре.
Массаза а укх хана дӀахьош йолча сагӀа даккхара проекта ший наӀараш хьаелларгья дукхача хьаьшашта: политикашта, дин викалашта, лорашта, Ӏилма дийшача наха, тӀема гӀулакх леладерашта, кагирхошта, иштта кхы а дуккхача наха. Из сайре цар тӀаэцаргья къаьстта йолча цхьоагӀонца.
«Рамадан бутт - из шера йоагӀа эггара езагӀа йола ха я, сага хьалхашка дукха таронаш хьаелл цо дика гӀулакхаш дара», - аьлар ГӀалгӀайчен кулгалхочо Келаматанаькъан Махьмуд-Ӏаьлас, ший бувзама оагӀошка.
Белгалду, «Рамадана чаьтар» - из хӀара шера дӀахьош йола культурно-дикача гӀулакхий проект хилар, из вӀашагӀйолл Москверча бусалба наьха дин урхаллено. Рамадан бутт болча хана чаьтар оттаду Поклонни гув оалача моттигерча Мемориальни маьждиге.
Малх чубизача, цхьана марха даста ловш бараш цига бех, иштта таро хургья къамаьлашка ладувгӀа а кхоллама болхлоша гойтарашка хьажа а.
