Магӏалбика кхален Инаркъе Ислама цӏи лелаю урам тоабир
Гӏалгӏайчен Магӏалбика кхален Инаркъерча Исламски урамах никъ тоабир. Из тоабар шийна тӏаийцар моттигерча администраце. Бехача хетта из кердабаккхаро таро лу, дикал йолаш хьалаш хьакхолла, машинашта а лела аттагӏа хул.
«Балхаш дӏахьош къаьстта терко тӏаяхийтар цу урамах лаьрххӏача тӏема операце доакъашхо вахаш хилара. Юрта администраце из хаттар сиха теркаме ийцар, наькъаш тоадара эшаш мел дар ӏалашдир. Доал деча даькъ тӏарча ӏаьдало керттера терко лоаттаю лаьрххӏача тӏема операце доакъашхошта, цар дезалашта», - аьлар «Сердало» газетага Магӏалбика кхален администраце зарбан болх лелабераша.
Моттигерча ӏаьдало дӏахо а цу даькъ тӏа шийна могар дергда, наькъа хьал дика хилийтара. Никъ тоабаь хилча кхераме доацаш дӏа-юха вахар, иштта транспортаца леларашта дика хьалаш хьакхоллар хул, цул совгӏа ерригача юрта бахархошка кхоачаш да из.
