Инаркъерча Исламски оалача урамера тока оагӏув меттайоалаеш баьхкар болхлой
Магӏалбика кхален Инаркъен моттигашка токаца дувзаденнараш меттадоаладеш, болх ба дӏахьош. Исламски оалача ураме керда тока бӏоагӏий догӏаш баьхкар болхлой. СВО доакъашхочо кхален хьакимашка дехар дарах кхоачашдаь гӏулакхаш да уж.
«Къаьнара тока бӏоагӏий хувца дезача кхаьча дикка ха яр. Цу доазон тӏарча цӏеношка ток боаггӏача боараме хилийтара тӏехьа лоархӏаме дар из. Юртара администраци яр болх дӏахьош хиннар», - йоах «Сердалога» Магӏалбика кхален администрацера бенача хоамо.
Керда бӏоагӏий догӏаро дикка меттадоаладергда тока хьал. Дикагӏа бола, кхераме боаца тока саьрг бӏоагӏех дӏахотта безаш ба тахан болхлой.
Белгалде деза, цу оагӏонцара гӏулакхаш боаггӏача боараме хилар лоархӏамеча декхарех долга, къаьстта шелал хьаоттале терко е езаш хӏама да из.
