ГӀалгӀай къаман
юкъара газет

Кердадараш

Сурхо тӀа кастлуш къоаной могашал тоаеча моттига шоллагӀа дакъа хьалдаь даргда

2023 шу йистедоалаш, Сурхо тӀа хьалъяь яргья вахара-унахцӀенон керттерча моттига шоллагӀа дакъа чудоагӀаш йола гӀишло, из лаьрхӀа я боккхийча наха-заӀапхошта, вешта аьлча, ветераний цӀа да из, аьнна, хоам бир газетага ГӀалгӀай Республикан къахьегама министерствос.

«Говзанчаша, болхлоша дукхагӀа бола болх йистебаьккхаб. ТӀера хьалъетта яьннай, тхов тиллаб, кирпишка пенаш хьалдеттад, чура балхаш даьхад, кораш дӀаоттадаьд. 80% из болх йистебаьннаб ала йиш йолаш ба. ХӀанз укх сахьате, бетона кIийле юллаш, кафель Ӏотохаш дола балхаш да хьадеш латтараш. Хий а начIас дIауха моттиг а хьаеш латт. Коа трансформаторни подстанци я Ӏооттаеш, котельни, хий дӀаухаш йола моттиг я кийчъеш», - аьлар гIишлонхоша.

Из гӀишло лаьрхӀа я 50 сага, «ДегӀаахар» яхача къаман проектага гIолла хьалъеш я из. Цун мах ба 310 млн сом. 

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде